mercoledì 21 dicembre 2016

21 dicembre 2013 alle ore 18:54 ·
Da "Viscuglia di ricordi" (di cosi passati) Ed.Comune di Favara-1997
NATALI DI NA VOTA di Giuseppe Casà. (1938-2002)
...
Ch'era beddru na vota lu Natali,
quannu i carusi acchiavanu i riali,
chi festa ranni china di nnuccenza,
china di cosi dunci e tanta spranza.
Sutta i nuveri chini 'i sparacogna
ognuno a so prieria ricitava
e o bammineddru ca a stu munnu vinni
na cosa sula si ci addumannava.
Paci pi la genti tribulata,
paci pi li nnuccenti senza pani,
cunfortu pi cu soffri ni la vita,
paci e sirinità pi l'infilici.
Ora cangiaru i tempi e puru i cori,
sparì a nnuccenza e i sintimenti boni,
sparì la sparacogna di 'i nuveri,
ognunu u vidi a modu sò u Natali.
Ora si penza a la gran tavulata,
a la facciazza di la caristia,
resta sulu u ricordu di na vota,
quannu u Natali veru s'aspittava.

Nessun commento: